Web Desk
ദോഹ: അമേരിക്കയിലെ ഖത്തറിന്റ നിക്ഷേപത്തെ വിലമതിക്കുന്നതായി യുഎസ് പ്രസിഡന്റ് ഡോണള്‍ഡ് ട്രംപ്. അമീറുമായുള്ള സൗഹൃദത്തെ പ്രസിഡന്റ് ട്രംപ് പ്രശംസിച്ചു. അമീറുമായുള്ള കൂടിക്കാഴ്ച ക്രിയാത്മകമാകുമെന്നും വ്യാപാരം, സൈനികം ഉള്‍പ്പടെയുള്ള മേഖലകള്‍ ചര്‍ച്ചയില്‍ ഉള്‍പ്പെടും. അമേരിക്കയിലെ ഖത്തറിന്റെ നിക്ഷേപവും പ്രസിഡന്റ് ചൂണ്ടിക്കാട്ടി.
അമീര്‍ മികച്ച സഖ്യകക്ഷിയാണെന്നും ഗംഭീരമായ സൈനികതാവളം സ്ഥാപിക്കാന്‍ സഹായിച്ചുവെന്നും അദ്ദേഹം പറഞ്ഞു. പ്രസിഡന്റ് പദവിയിലിരിക്കുന്നതിനു മുമ്പുതന്നെ ശൈഖ് തമീം വളരെക്കാലമായി സുഹൃത്താണെന്നും തങ്ങള്‍ക്ക് പരസ്പരം വളരെ സുഖകരമായ അനുഭവമായി തോന്നുന്നുവെന്നും ട്രംപ് പറഞ്ഞു. ലോകത്തിലെ ഏറ്റവും വലിയ നിക്ഷേപങ്ങളിലൊന്നാണ് ഖത്തറിന്റെ അമേരിക്കന്‍ നിക്ഷേപം.
വളരെയധികം വിലമതിക്കപ്പെടുന്നു. ഖത്തര്‍ വാങ്ങുന്ന പ്ലെയ്‌നുകള്‍, നിക്ഷേപിക്കുന്ന മറ്റു കാര്യങ്ങള്‍ എന്നിവയെല്ലാം തനിക്കറിയാം. താന്‍ അതിനെ വ്യത്യസ്തമായാണ് കാണുന്നത്. താന്‍ അതിനെ ജോലികളായാണ് കാണുന്നത്്. കാരണം തന്നെ സംബന്ധിച്ചിടത്തോളം ഇത് ജോലികളാണ്. ഇന്ന് തങ്ങള്‍ തൊഴിലുകള്‍ക്കായി പുതിയ റെക്കോര്‍ഡ് സ്ഥാപിച്ചു. തങ്ങള്‍ ഇത് ദിവസേന സജ്ജീകരിക്കുന്നു- ട്രംപ് പറഞ്ഞു.
വാഷിങ്ടണ്‍ ഡിസിയിലെ യുഎസ് ട്രഷറി ആസ്ഥാനത്തു നടന്ന അത്താഴവിരുന്നില്‍ യുഎസ് പ്രതിരോധ ആക്ടിങ് സെക്രട്ടറി ഡോ.മാര്‍ക്ക് എസ്പര്‍, വാണിജ്യ സെക്രട്ടറി വില്‍ബര്‍ റോസ്, ഗതാഗത സെക്രട്ടറി ഇലെയ്ന്‍ ചാവോ, ഊര്‍ജ സെക്രട്ടറി റിക് പെറി, രാജ്യാന്തര മോണിറ്ററി ഫണ്ട്(ഐഎംഎഫ്) മാനേജിങ് ഡയറക്ടറും ചെയര്‍വുമണുമായ ക്രിസ്റ്റീന്‍ ലഗാര്‍ഡെ, അമേരിക്കന്‍ പ്രസിഡന്റിന്റെ മുതിര്‍ന്ന ഉപദേഷ്ടാവ് ജാരെദ് കുഷ്‌നര്‍, യുഎസ് കോണ്‍ഗ്രസ് അംഗങ്ങള്‍, മുന്‍ അംഗങ്ങള്‍, അമേരിക്കന്‍ രാഷ്ട്രീയ നേതാക്കള്‍, വ്യവസായ പ്രമുഖര്‍, സാമ്പത്തികവിദഗ്ദ്ധര്‍ തുടങ്ങിയവര്‍ പങ്കെടുത്തു.
യുഎസ് ട്രഷറി സെക്രട്ടറി അമീറിനെയും ഔദ്യോഗിക പ്രതിനിധിസംഘത്തെയും സ്വാഗതം ചെയ്തു. രണ്ടു സൗഹൃദ രാജ്യങ്ങള്‍ക്കിടയിലെ ഉഭയകക്ഷിസഹകരണത്തിന്റെ ആഴം അടിവരയിടുന്നതാണ് അമീറിന്റെ യുഎസ് സന്ദര്‍ശനമെന്ന് അദ്ദേഹം ചൂണ്ടിക്കാട്ടി.
