Web Desk
ദോഹ: ഈ ജനുവരിയില്‍ രാജ്യത്തിന്റെ വിദേശവ്യാപാരമിച്ചത്തില്‍ 20.7 ശതമാനം കുറവ്. 12.5 ബില്യണ്‍ റിയാലാണ് ജനുവരിയിലെ വിദേശവ്യാപാരമിച്ചം. കഴിഞ്ഞവര്‍ഷം ജനുവരിയെ അപേക്ഷിച്ച് 3.3 ബില്യണ്‍ റിയാലിന്റെയും(20.7ശതമാനം) കഴിഞ്ഞ വര്‍ഷം ഡിസംബറിനെ അപേക്ഷിച്ച് 1.8 ബില്യണ്‍ റിയാലിന്റെയും(12.4ശതമാനം) കുറവുണ്ടായിട്ടുണ്ട്. രാജ്യത്തിന്റെ ആകെ കയറ്റുമതിയും ഇറക്കുമതിയും തമ്മിലുള്ള വ്യത്യാസമാണ് വ്യാപാരമിച്ചമായി കണക്കാക്കുന്നത്.
പ്ലാനിങ് ആന്റ് സ്റ്റാറ്റിസ്റ്റിക്‌സ് അതോറിറ്റിയുടെ ഏറ്റവും പുതിയ റിപ്പോര്‍ട്ടിലാണ് ഇക്കാര്യങ്ങളുള്ളത്. ആഭ്യന്തര ഉത്പന്നങ്ങളുടെ കയറ്റുമതിയും പുന:കയറ്റുമതിയും ഉള്‍പ്പെടെ 22.4 ബില്യണ്‍ റിയാലിന്റെ കയറ്റുമതി ഈ ജനുവരിയില്‍ നടന്നു. കഴിഞ്ഞവര്‍ഷം ജനുവരിയെ അപേക്ഷിച്ച് ഒന്‍പത് ശതമാനത്തിന്റെയും കഴിഞ്ഞ ഡിസംബറിനെ അപേക്ഷിച്ച് അഞ്ചുശതമാനത്തിന്റെയും കുറവ്. ഈ ജനുവരിയില്‍ 9.9 ബില്യണ്‍ റിയാലിന്റെ ഉത്പന്നങ്ങളാണ് ഇറക്കുമതി ചെയ്തത്. കഴിഞ്ഞവര്‍ഷം ജനുവരിയെ അപേക്ഷിച്ച് ഇറക്കുമതിയില്‍ 11.9 ശതമാനം വര്‍ധന. പ്രതിമാസാടിസ്ഥാനത്തില്‍ ഇറക്കുമതിയില്‍ 6.4 ശതമാനത്തിന്റെ വര്‍ധനവുണ്ടായിട്ടുണ്ട്. പെട്രോളിയം ഗ്യാസ്, മറ്റു ഗ്യാസസ് ഹൈഡ്രോകാര്‍ബണ്‍(ദ്രവീകൃത പ്രകൃതിവാതകം, കണ്‍ഡന്‍സേറ്റ്‌സ്, പ്രൊപ്പെയ്ന്‍, ബ്യൂട്ടെയ്ന്‍) ഉല്‍പ്പന്നങ്ങളുടെ കയറ്റുമതിയിലെ കുറവാണ് ആകെ കയറ്റുമതിയുടെ തോത് കുറയാനിടയാക്കിയത്. ഇവയുടെ കയറ്റുമതി ഈ ജനുവരിയില്‍ 15.1 ബില്യണ്‍ റിയാലാണ്, 6.8 ശതമാനത്തിന്റെ കുറവ്. പെട്രോളിയം എണ്ണ, ബിറ്റുമിനസ് മിനറല്‍സ്(ക്രൂഡ്) എണ്ണ കയറ്റുമതിയിലും കുറവുണ്ടായിട്ടുണ്ട്.
ഇവയുടെ കയറ്റുമതി 3.2 ബില്യണ്‍ റിയാല്‍, 15.7 ശതമാനത്തിന്റെ കുറവ്. പെട്രോളിയം എണ്ണ, ക്രൂഡ് അല്ലാത്ത ബിറ്റുമിനസ് മിനറല്‍സ് കയറ്റുമതി 1.2 ബില്യണ്‍ ഖത്തര്‍ റിയാലാണ്, ഇവയുടെ കയറ്റുമതിയില്‍ 26.1 ശതമാനത്തിന്റെ കുറവുണ്ടായി. ഇറക്കുമതി ഉത്പന്നങ്ങളില്‍ മോട്ടോര്‍ കാറുകളുടെയും മറ്റു വാഹനങ്ങളുടെയും ഇറക്കുമതിയാണ് ഒന്നാം സ്ഥാനത്ത്, 0.4 ബില്യണ്‍ റിയാല്‍. കഴിഞ്ഞവര്‍ഷം ജനുവരിയെ അപേക്ഷിച്ച് 25.2ശതമാനം വര്‍ധനവ്. എയര്‍ക്രാഫ്റ്റുകള്‍, സ്‌പെയ്‌സ്‌ക്രാഫ്്റ്റുകള്‍, ബലൂണുകള്‍ എന്നിവയാണ് രണ്ടാമത്, 0.39 ബില്യണ്‍ റിയാലിന്റെ ഉത്പന്നങ്ങളാണ് ഇറക്കുമതി ചെയ്തത്, 33.2ശതമാനം വര്‍ധന. പ്ലാറ്റിനം പൂശിയ സ്വര്‍ണം ഉള്‍പ്പടെയുള്ള സ്വര്‍ണ ഇറക്കുമതിയാണ് മൂന്നാമത്, 0.2 ബില്യണ്‍ റിയാല്‍.
ഇവയുടെ ഇറക്കുമതിയില്‍ മുന്‍വര്‍ഷത്തെ അപേക്ഷിച്ച് 48.6ശതമാനത്തിന്റെ വര്‍ധനവുണ്ടായിട്ടുണ്ട്. ജനുവരിയില്‍ ഖത്തറിന്റെ കയറ്റുമതിയില്‍ മുന്നില്‍ ജപ്പാനാണ്, ഏകദേശം 4.3 ബില്യണ്‍ റിയാലിന്റെ കയറ്റുമതി ജപ്പാനിലേക്ക് നടത്തി, ആകെ കയറ്റുമതിയുടെ 19.1 ശതമാനം വരുമിത്. രണ്ടാം സ്ഥാനം ചൈന, ഏകദേശം 3.6 ബില്യണിന്റെ കയറ്റുമതി, 16.1 ശതമാനം. മൂന്നാംസ്ഥാനത്ത് ദക്ഷിണകൊറിയ, 3.3 ബില്യണ്‍ റിയാല്‍, 14.7 ശതമാനം.
ജനുവരിയില്‍ ചൈനയില്‍ നിന്നാണ് ഖത്തര്‍ ഏറ്റവുമധികം ഇറക്കുമതി നടത്തിയത്. രണ്ടു ബില്യണ്‍ റിയാല്‍, ആകെ ഇറക്കുമതിയുടെ 19.7 ശതമാനം. രണ്ടാമത് അമേരിക്ക, 1.5 ബില്യണ്‍ റിയാല്‍. ആകെ ഇറക്കുമതിയുടെ 15.7 ശതമാനം വരുമിത്. മൂന്നാമത് ജര്‍മ്മനി, 0.7 ബില്യണ്‍ റിയാല്‍, ആകെ ഇറക്കുമതിയുടെ 7.3 ശതമാനം.
