in ,

വ്യാജ കമ്പനികളുടെ പേരില്‍ ബാങ്ക് തട്ടിപ്പ്: മൂന്നു പേര്‍ അറസ്റ്റില്‍

ദോഹ: വ്യാജ കമ്പനികളുടെ പേരില്‍ ബാങ്ക് തട്ടിപ്പ് നടത്തിയ മൂന്നു ഏഷ്യന്‍ സ്വദേശികളെ അറസ്റ്റ് ചെയ്തതായി ആഭ്യന്തര മന്ത്രാലയം അറിയിച്ചു. ബാങ്ക് ട്രാന്‍സ്ഫര്‍ ഉത്തരവുകള്‍ വ്യാജമായി തയാറാക്കിയെന്ന കുറ്റത്തിനാണ് ഇവര്‍ പിടിയിലായത്. പ്രാദേശിക കമ്പനികള്‍ക്കായി വ്യാജമായി ബാങ്ക് ട്രാന്‍സ്ഫര്‍ ഓര്‍ഡറുകള്‍ തയാറാക്കുകയും ഫണ്ടുകള്‍ വ്യാജ കമ്പനികളുടെ അക്കൗണ്ടിലേക്ക് മാറ്റുകയുമായിരുന്നു ഇവര്‍ ചെയ്തിരുന്നത്.

കുറ്റാന്വേഷണത്തിന്റെ ചുമതലയുള്ള ജനറല്‍ ഡയറക്ടറേറ്റിലെ സാമ്പത്തിക, ഇലക്ട്രോണിക് കുറ്റകൃത്യങ്ങള്‍ പ്രതിരോധിക്കുന്ന വകുപ്പാണ് മൂന്നുപേരെ പിടികൂടിയത്. പ്രതികള്‍ വ്യാജരേഖകളുമായി ക്രയവിക്രയം നടത്തുന്നതിനിടെ ബന്ധപ്പെട്ട ബാങ്കുമായി ഏകോപിപ്പിച്ചായിരുന്നു നടപടി. ഇവരുടെ വീടുകള്‍ പരിശോധിച്ചതില്‍ വിവിധ സാങ്കല്‍പ്പിക കമ്പനികളുടെ വ്യാജ ഒപ്പുകളോടെയുള്ള ചെക്ക് ബുക്കുകള്‍, നിരവധി എടിഎം കാര്‍ഡുകള്‍, ക്രെഡിറ്റ് കാര്‍ഡുകള്‍, പര്‍ച്ചേസ് ചെയ്ത ബില്ലുകള്‍ എന്നിവയെല്ലാം കണ്ടെത്തി. ചോദ്യം ചെയ്യലില്‍ മൂന്നുപേരും കുറ്റസമ്മതം നടത്തി.

നിയമപരമായ നടപടിക്രമങ്ങള്‍ പൂര്‍ത്തിയാക്കാനായി ബന്ധപ്പെട്ട അതോറിറ്റികളുടെ മുന്നില്‍ ഇവരെ ഹാജരാക്കി. ഇലക്ട്രോണിക് തട്ടിപ്പുകള്‍ മൂലമുള്ള സാമ്പത്തിക നഷ്ടം തടയുന്നതിനായി, നിര്‍ദ്ദിഷ്ട മാര്‍ഗങ്ങളിലൂടെയല്ലാതെ ഫണ്ടുകള്‍ പിന്‍വലിക്കുകയോ പര്‍ച്ചേസ് നടത്തുകയോ കൈമാറ്റം ചെയ്യുകയോ ചെയ്യുന്നതായി ശ്രദ്ധയില്‍പ്പെട്ടാല്‍, വകുപ്പുമായി സഹകരിക്കണമെന്ന് വാണിജ്യ ധനകാര്യസ്ഥാപനങ്ങളോടും കമ്പനികളോടും ആവശ്യപ്പെട്ടിട്ടുണ്ട്.

What do you think?

Written by Web Desk

Leave a Reply

Your email address will not be published.

സ്‌കിപ്പിങ് റോപ്പ് ചാമ്പ്യന്‍ഷിപ്പ് സംഘടിപ്പിച്ചു

‘എ ജി ബേഖുദീ’ സംഗീത പരിപാടി നാളെ