Web Desk
- 3143 പേര്‍ ചികിത്സയില്‍
- 395 പേര്‍ ആസ്പത്രിയില്‍
ദോഹ: ഖത്തറില്‍ കഴിഞ്ഞ 24 മണിക്കൂറിനുള്ളില്‍ 215 പേര്‍ക്ക് കൊറോണ വൈറസ്(കോവിഡ്-19) രോഗം സ്ഥിരീകരിച്ചു. ഒരു ദിവസത്തെ ഇടവേളക്കുശേഷം പ്രതിദിന രോഗബാധിതരുടെ എണ്ണം 200നു മുകളിലായി. രാജ്യത്ത് ഇതുവരെ രോഗം സ്ഥിരീകരിച്ചത് 1,11,322 പേര്‍ക്കാണ്. കഴിഞ്ഞദിവസത്തേക്കാള്‍ പുതിയ കോവിഡ് രോഗികളുടെ എണ്ണത്തില്‍ ഇന്ന് വര്‍ധനവുണ്ടായിട്ടുണ്ട്. അതേസമയം ഇന്ന് കോവിഡ് മരണങ്ങളൊന്നും റിപ്പോര്‍ട്ട് ചെയ്യാതിരുന്നത് ആശ്വാസകരമാണ്. കോവിഡ് ബാധിച്ച് ഇതേവരെ രാജ്യത്ത് 177 പേരാണ് മരണപ്പെട്ടത്.
കോവിഡ് ചികിത്സയിലുള്ളവരുടെയും ആസ്പത്രിയിലുള്ളവരുടെ എണ്ണത്തിലെ കുറവ് തുടരുന്നു. ഇന്ന് 223 പേര്‍ക്കു കൂടി രോഗം മാറി. കഴിഞ്ഞദിവസത്തെ അപേക്ഷിച്ച് രോഗമുക്തരുടെ എണ്ണത്തില്‍ വര്‍ധനവുണ്ട്. ഇതുവരെ 1,08,002 പേരാണ് സുഖംപ്രാപിച്ചത്. ഇന്ന് പുതിയ രോഗികളേക്കാള്‍ രോഗമുക്തരുടെ എണ്ണം വര്‍ധിച്ചു.
നിലവില്‍ 3143 പേരാണ് ചികിത്സയിലുള്ളത്. ഇതില്‍ 395 പേര്‍ ആസ്പത്രിയില്‍ ചികിത്സയിലാണ്, 75 പേര്‍ തീവ്രപരിചരണ വിഭാഗത്തിലാണ്. കഴിഞ്ഞ 24 മണിക്കൂറിനുള്ളില്‍ 48 പേരെ ആസ്പത്രിയിലും രണ്ടുപേരെ തീവ്രപരിചരണ വിഭാഗത്തിലും പ്രവേശിപ്പിച്ചു. രാജ്യത്ത് ഇതുവരെ 5,02,792 പേരെയാണ് കോവിഡ് പരിശോധനക്ക് വിധേയരാക്കിയത്. കഴിഞ്ഞ 24 മണിക്കൂറിനുള്ളില്‍ 2256 പേരെ പരിശോധനക്ക് വിധേയരാക്കി.
കോവിഡിന്റെ വ്യാപനം കുറക്കുന്നതിനായി സ്വീകരിച്ച നടപടികള്‍ കൂടുതല്‍ ഫലപ്രദമാകുന്നുണ്ട്. എങ്കിലും വരുംദിവസങ്ങളിലും ഏറ്റവുമധികം ജാഗ്രത പാലിക്കുകയും പ്രായമേറിയവും വിട്ടുമാറാത്ത അസുഖങ്ങള്‍ ഉള്ളവരും ഉള്‍പ്പടെ ഏറ്റവും ദുര്‍ബലരായവരെ സംരക്ഷിക്കുകയും വേണമെന്ന് പൊതുജനാരോഗ്യ മന്ത്രാലയം ആവശ്യപ്പെട്ടു.
