ഖത്തറില്‍ ഒരാള്‍ കൂടി കോവിഡ് ബാധിച്ച് മരിച്ചു; 258 പേര്‍ക്കു കൂടി രോഗം

• 240 പേര്‍ കൂടി രോഗമുക്തരായി
• 2957 പേര്‍ ചികിത്സയില്‍, 421 പേര്‍ ആസ്പത്രിയില്‍

ദോഹ: ഖത്തറില്‍ കോവിഡ് ബാധിച്ച് ഒരാള്‍ കൂടി മരിച്ചു. ചികിത്സയിലായിരുന്ന 63 വയസ് പ്രായമുള്ള വ്യക്തിയാണ് മരിച്ചത്. ഇതോടെ രാജ്യത്ത് കോവിഡ് ബാധിച്ച് മരിച്ചവരുടെ എണ്ണം 212 ആയി. കഴിഞ്ഞ 24 മണിക്കൂറിനുള്ളില്‍ 258 പേര്‍ക്കാണ് പുതിയതായി രോഗം സ്ഥിരീകരിച്ചത്. വിദേശങ്ങളില്‍ നിന്നും മടങ്ങിയെത്തിയ പത്തു പേരിലാണ് ഇന്ന് രോഗം സ്ഥിരീകരിച്ചത്. മറ്റു 248 എണ്ണം കമ്യൂണിറ്റി കേസുകളാണ്. കഴിഞ്ഞദിവസം പ്രതിദിന രോഗികളുടെ എണ്ണം 300ലധികമായിരുന്നു. ഇന്ന് പുതിയ രോഗികളുടെ എണ്ണത്തില്‍ കുറവുണ്ടായിട്ടുണ്ട്. രാജ്യത്ത് ഇതുവരെ രോഗം ബാധിച്ചവരുടെ എണ്ണം 1,24,175 ആയി.

കഴിഞ്ഞ 24 മണിക്കൂറിനിടെ 240 പേര്‍ കൂടി സുഖംപ്രാപിച്ചു. കഴിഞ്ഞദിവസത്തെ അപേക്ഷിച്ച് ഇന്ന് രോഗമുക്തരുടെ എണ്ണത്തില്‍ വര്‍ധനവുണ്ട്. ഇതുവരെ 1,21,006 പേരാണ് രോഗമുക്തരായത്. നിലവില്‍ 2957 പേരാണ് ചികിത്സയിലുള്ളത്. ഇതില്‍ 421 പേര്‍ ആസ്പത്രിയിലാണ്. 64 പേരാണ് തീവ്രപരിചരണ വിഭാഗത്തില്‍ ചികിത്സയില്‍ കഴിയുന്നത്. കഴിഞ്ഞ 24 മണിക്കൂറിനുള്ളില്‍ 36 പേരെ ആസ്പത്രിയിലും രണ്ടു പേരെ തീവ്രപരിചരണ വിഭാഗത്തിലും പ്രവേശിപ്പിച്ചു. രാജ്യത്ത് ഇതുവരെ 7,39,091 പേരെയാണ് കോവിഡ് പരിശോധനക്ക് വിധേയരാക്കിയത്. കഴിഞ്ഞ 24 മണിക്കൂറിനുള്ളില്‍ 4950 പേരെ പരിശോധിച്ചു.