in ,

ഖത്തറിന്‍റേത്​ മികച്ച ലോകകപ്പ്​ തയ്യാറെടുപ്പ്​; ഫിഫക്ക്​ ആത്​മവിശ്വാസമെന്ന്​ സുരക്ഷാ ഡയറക്ടർ

സെക്യൂരിറ്റി ലാസ്റ്റ്​ മൈൽ സമ്മേളനത്തിൽ ഫിഫ സുരക്ഷാ ഡയറക്ടർ ഹെൽമട്ട്​ സ്പാൻ

ദോഹ: ലോകകപ്പിനായി ഖത്തർ സ്വീകരിച്ച മുൻകരുതലും ഒരുക്കവും ഏറ്റവും മികച്ച ലോകകപ്പ്​ തന്നെ ഈ മണ്ണിൽ ഒരുക്കാൻ കഴിയുമെന്ന നിലയിൽ ഫിഫക്ക്​ ആത്​മവിശ്വാസം പകരുന്നതാണന്ന്​ ഫിഫ സെക്യുരിറ്റി ഡയറക്ടർ ഹെൽമട്ട്​ സ്പാൻ.


നവംബർ 21ന്​ തുടങ്ങി ഡിസംബർ 18ന്​ അവസാനിക്കുന്ന ലോകകപ്പിനായി വർഷങ്ങളുടെ ശ്രമകരമായ ദൗത്യത്തിലൂടെ ഏറ്റവും മികച്ച സെക്യുരിറ്റി പദ്ധതിയാണ്​ പൂർത്തിയാക്കിയതെന്നും
ലോകകപ്പിനായി ഖത്തർ ഒരുക്കിയ സുരക്ഷാ ക്രമീകരണങ്ങൾ ചർച്ചചെയ്യുന്ന സെക്യൂരിറ്റി ലാസ്റ്റ്​ മൈൽ സമ്മേളനത്തിൽ പ​ങ്കെടുത്തുകൊണ്ട്​ അദ്ദേഹം വ്യക്​തമാക്കി.

സുരക്ഷാ മേഖലയിൽ ആതിഥേയ രാജ്യം നടത്തിയ ഒരുക്കങ്ങൾ, ഏറ്റവും സുരക്ഷിതവും ഭദ്രവുമായ ലോകകപ്പ്​ നടത്താൻ ഫിഫക്ക്​ സൗകര്യമൊരുക്കുന്നതാണ്​.

തുടക്കം മുതൽ രാജ്യന്തര തലത്തിലെ സഹകരണവും ഖത്തറിന്​ ഉറപ്പാക്കാൻ കഴിഞ്ഞതായും ഫിഫ സെക്യുരിറ്റി ഡയറക്ടർ വ്യക്​തമാക്കി.


2012ൽ സെക്യൂരിറ്റി ആന്‍റ്​ ​സേഫ്​റ്റി ഓപറേഷന കമ്മിറ്റി ആരംഭിച്ചത്​ മുതൽ ഫിഫ സഹകരിച്ച്​ പ്രവർത്തിക്കുന്നുണ്ട്​. വിശ്രമമില്ലാത്ത തയ്യാറെടുപ്പും, ടീം വർക്കും, കഠിനാധ്വാനവും പ്രശംസനീയമാണ്​.


മേഖലയിൽ നിന്നും കാര്യമായ പ്രതിസന്ധികൾ നേരിട്ട സമയത്തും കുറ്റമറ്റ രീതിയിൽ തന്നെ ദൗത്യങ്ങൾ പൂർത്തിയാക്കി മുന്നോട്ട്​ പോവാൻ കഴിഞ്ഞത്​ പ്രശംസാവഹമാണ്​.


ഏ​തൊരു ആഗോള മേളകളിലും നിരവധി വെല്ലുവിളികളും വ്യത്യസ്ത സാഹചര്യങ്ങളും ആതിഥേയർക്ക്​ നേരിടേണ്ടിവരും. മുൻകാലങ്ങളിൽ ലോകകപ്പ്​ വേദികളായ ജർമ്മനി, ദക്ഷിണാഫ്രിക്ക, ബ്രസീൽ, റഷ്യ എന്നീ രാജ്യങ്ങളിലും അവരുടേതായ വെല്ലുവിളികളുണ്ടായിരുന്നു. ഖത്തറിനും പുതിയകാലത്തിന്‍റേതായ വെല്ലുവിളികളുണ്ടാവും.

അവ​നേരിടാൻ സംവിധാനങ്ങൾസജ്ജമാണ്​ -അദ്ദേഹം പറഞ്ഞു. ലോകകപ്പിന്‍റെ കുറ്റമറ്റ സംഘാടനത്തിനായി ഖത്തർ നടപ്പാക്കിയ സുരക്ഷാ പദ്ധതികളെ ഹെൽമട്ട്​ സ്പാൻ അഭിനന്ദിച്ചു.

അന്താരാഷ്‌ട്ര സുരക്ഷാ മാനദണ്ഡങ്ങൾ പാലിച്ച്​, ഏറ്റവും മികച്ചതും കുറ്റമറ്റതും സുരക്ഷിതവുമായ ലോകകപ്പിനാണ്​ ഖത്തർ ഒരുങ്ങുന്നതെന്ന്​ ടൂർണമെന്‍റിന്‍റെ സുരക്ഷാകാര്യങ്ങൾക്ക്​ നേതൃത്വം വഹിക്കുന്ന സേഫ്​റ്റി ആന്‍റ്​ സെക്യൂരിറ്റി ഓപറേഷൻസ്​ കമ്മിറ്റി മേധാവി മേജർ ജനറൽ അബ്​ദുൽ അസീസ്​ അബ്​ദുല്ല അൽ അൻസാരി പറഞ്ഞു.

കോവിഡ്​ വ്യാപനത്തിനിടയിലും രാജ്യാന്തര ടൂർണമെന്‍റുകൾക്ക്​ വിജയകരമായി വേദിയൊരുക്കി ആരോഗ്യ-സുരക്ഷാ മുൻകരുതലുകളിൽ ശ്രദ്ധേയമായ നേട്ടം സ്ഥാപിച്ചതായും അദ്ദേഹം വിശദീകരിച്ചു.

ലോകകപ്പിനായി യോഗ്യത നേടിയ ടീമുകളുടെ സുരക്ഷാ ചുമതലയുള്ള പ്രതിനിധികൾ, രാജ്യാന്തര ഫുട്​ബാൾ ഫെഡറേഷനായ ഫിഫ, ഐക്യരാഷ്ട്ര സഭ, രാജ്യാന്തര അന്വേഷണ-സുരക്ഷാ ഏജൻസികളായ ഇന്‍റർപോൾ, യൂറോപോൾ പ​ങ്കെടുക്കുന്നതാണ്​ സമ്മേളനം.

പ്രധാനമന്ത്രി ശൈഖ്​ ഖാലിദ്​ ബിൻ ഖലീഫ ബിൻ അബ്​ദുൽ അസീസ്​ അൽതഥാനി ഉദ്​ഘാടനം നിർവഹിച്ചു. പ്രതിരോധ മന്ത്രിയും ഉപപ്രധാനമന്ത്രിയുമായ ഡോ. ഖാലിദ്​ ബിൻ മുഹമ്മദ്​ അൽഅതിയ്യ, മന്ത്രിമാർ, മുതിർന്ന ഉദ്യോഗസ്​ഥർ, നയതന്ത്ര പ്രതിനിധികൾ, ആഭ്യന്തര-പ്രതിരോധ ഉദ്യോഗസ്​ഥർ പ​ങ്കെടുത്തു.


ലോകകപ്പിന്‍റെ വിജയകരമായ നടത്തിപ്പിനായി ഖത്തർ ഒരുക്കിയ സുരക്ഷാ സംവിധാനങ്ങൾ അവതരിപ്പിക്കുക, തയ്യാറെടുപ്പുകൾ അവലോകനം നടത്തുക, സുരക്ഷാ പ്ലാനുകൾ നടപ്പാക്കുക, തന്ത്രപരമായ ആസൂത്രണം, മേഖലയിലെയും, രാജ്യാന്തര തലതിലെയും സുരക്ഷാ വിഭാഗങ്ങളുടെ സഹകരണം എന്നിവയാണ്​ സമ്മേളന ലക്ഷ്യം.
ഞായർ, തിങ്കൾ ദിവസങ്ങളിലായി നടന്ന സമ്മേളനത്തിന്​ ഇന്‍റർകോണ്ടിനെന്‍റൽ ഹോട്ടലാണ്​ വേദി.

What do you think?

Written by Web Desk

Leave a Reply

Your email address will not be published.

ഇന്‍കാസ് ഖത്തര്‍: സമീര്‍ എറാമലയെ വീണ്ടും പ്രസിഡന്റായി നിയോഗിച്ച് കെ.പി.സി.സി  

ഇന്ത്യന്‍ ഉപരാഷ്ട്രപതിയും ആരോഗ്യമന്ത്രിയും  ജൂണ്‍ 4-ന് ദോഹയില്‍