ഖത്തറില്‍ ഇന്ന് കോവിഡ് മരണങ്ങളില്ല; 213 പേര്‍ക്ക് കൂടി രോഗം

• 219 പേര്‍ കൂടി രോഗമുക്തരായി
• 2849 പേര്‍ ചികിത്സയില്‍

ദോഹ: ഖത്തറില്‍ കഴിഞ്ഞ 24 മണിക്കൂറിനിടെ 213 പേര്‍ക്കു കൂടി കോവിഡ് സ്ഥിരീകരിച്ചു. കഴിഞ്ഞ ദിവസത്തെ അപേക്ഷിച്ച് ഇന്നും പ്രതിദിന രോഗികളുടെ എണ്ണത്തില്‍ കുറവുണ്ടായിട്ടുണ്ട്. പുതിയ രോഗികളില്‍ 191 പേര്‍ ഖത്തറിലുള്ളവരും 22 പേര്‍ ദോഹയിലേക്ക് വിവിധ രാജ്യങ്ങളില്‍ നിന്നെത്തിയവരുമാണ്. എല്ലാ രോഗികളേയും ഐസൊലേഷന്‍ കേന്ദ്രത്തിലേക്ക് മാറ്റിയിട്ടുണ്ട്. ഖത്തറില്‍ ഇതേവരെ 1,27,394 പേര്‍ക്കാണ് കോവിഡ് സ്ഥിരീകരിച്ചത്.

ഒരു ദിവസത്തെ ഇടവേളക്കുശേഷം ഇന്ന് കോവിഡ് മരണങ്ങളൊന്നും റിപ്പോര്‍ട്ട് ചെയ്തിട്ടില്ലെന്നത് ആശ്വാസകരമാണ്. കഴിഞ്ഞദിവസം വരെ 218 പേരാണ് കോവിഡ് ബാധിച്ച് മരിച്ചത്. കഴിഞ്ഞ 24 മണിക്കൂറിനിടെ 219 പേര്‍ക്ക് കൂടി രോഗം ഭേദമായി. ഇതുവരെ 1,24,327 പേരാണ് സുഖംപ്രാപിച്ചത്.നിലവില്‍ 2849 പേരാണ് ചികിത്സയിലുള്ളത്. 361 പേരാണ് ആസ്പത്രിയില്‍ കഴിയുന്നത്. ഇവരില്‍ 39 പേരെ കഴിഞ്ഞ 24 മണിക്കൂറിനുള്ളിലാണ് ആസ്പത്രിയില്‍ പ്രവേശിപ്പിച്ചത്. തീവ്രപരിചരണവിഭാഗത്തില്‍ 56 പേര്‍ ചികിത്സയിലുണ്ട്. ഇതില്‍ അഞ്ചു പേര്‍ പുതുതായി എത്തിയതാണ്. കഴിഞ്ഞ 24 മണിക്കൂറിനുള്ളില്‍ 4994 പേരെ പരിശോധനക്ക് വിധേയരാക്കി. ഇതുവരെ 8,15,021 പരിശോധനകളാണ് നടത്തിയത്.